Жәңгір хан университетінде «Кәсіби бағдар берудің үздік тәжірибелері» тақырыбында воркшоп форматындағы іс-шара өтуде.
Өңіріміздегі мектептер мен колледждердің кәсіби бағдар берушілеріне арналған шараның дүйсенбі күнгі алғашқы жиынына облыс әкімінің орынбасары Бақытжан Нарымбетов, БҚО білім басқармасының басшысы Айгүл Мыңбаева, Жәңгір хан университетінің басқарма төрағасы-ректор Асқар Наметов қатысты.
Өз сөзінде облыс әкімінің орынбасары Бақытжан Нарымбетов маңызды шараны ұйымдастырған университет басшылығына алғыс білдірді. Жиын барысында басқарма төрағасы-ректор А.Наметов мамандарға кәсіби бағдар берудегі университеттердің рөлі жайында баяндама жасаса, оқу жұмыстары жөніндегі проректор Нұркен Губашев Жәңгір хан атындағы БҚАТУ-дың білім беру саласындағы заманауи тәсілдермен таныстырды.
Бұдан кейін кәсіби бағдар берушілер бірнеше топқа бөлініп, секциялық жұмыстарға қатысты. Сондай-ақ түрлі тренингтер және университетке саяхат ұйымдастырылды. Осы аптаның соңына дейін жалғасатын воркшопта кәсіби бағдар берушілер үш кезең бойынша қамтылатын болады.
