Жәңгір хан университетінің қауымдастырылған профессоры, техника ғылымдарының кандидаты Төребек Байбатыров «Болашақ» халықаралық бағдарламасының «500 ғалым» жобасы аясында Беларусь мемлекеттік аграрлық техникалық университетінде алты айлық ғылыми тағылымдамадан өтіп келді.
Төребек Әуелбайұлының ғылыми-зерттеу тақырыбы «Құрама жем өндірісінің заманауи тиімді технологиясы» деп аталады, ал ғылыми жетекшісі – ауыл шаруашылығы және экономика ғылымдарының докторы, профессор Николай Степанович Яковчик.
Ғалым ғылыми тағылымдама барысында Беларусь еліндегі бірнеше зертханада, үлкен өндіріс орындарында және шаруашылықтарда болды. Сонымен қатар ғылыми-практикалық конференцияларға, инновациялық жұмыстар жәрмеңкесіне қатысты. Ғылыми мақалалары республикалық, халықаралық деңгейдегі жинақтарда жарияланды.
Төребек Әуелбайұлы алты ай ішінде ғылыми тағылымдасының нәтижелі өтуіне атсалысқан Беларусь мемлекеттік аграрлық техникалық университетінің ұжымына және ғылыми жетекшісіне алғыс білдірді.
